Бөгөн Иҫке Муса ауыл китапханаһында башҡорт телендә сыҡҡан “Аҡбуҙат” республика балалар журналының баш мөхәррире, шағирә, Шәйехзада Бабич исемендәге республика дәүләт йәштәр премияһы лауреаты Лариса Хашим ҡыҙы Абдуллина менән осрашыу ойошторолдо. Осрашыуҙа ауыл хакимиәте башлығы Илмира Әнүәр ҡыҙы Ғәлиәхмәтова ҡатнашты. Лариса Хашим ҡыҙы яңы тыуып торған 2021 йылда “Аҡбуҙат” журналының сыға башлауына 30 йыл тулыуын белдерҙе. Ул балаларҙы журнал менән таныштырҙы, журналға яҙылыусылар араһында үткәрелгән конкурстар, еңеүселәргә заманса ҡиммәтле бүләктәр әҙерләнеүе хаҡында һөйләне. Баш мөхәррир сарала ҡатнашыусыларға, ниндәй ҙә булһа эш эшләгәндә хата ебәреүҙән оялмаҫҡа кәрәк, тине. Гәзит – журнал менән хеҙмәттәшлек иткәндә лә бер тапҡыр ғына шиғыр йә мәҡәлә ебәреп ҡул һелтәргә ярамай, камиллыҡҡа ынтылырға кәрәклеген әйтте. Өфө ҡунағының һорауҙарына дөрөҫ яуап биргән балалар бүләктәр алып ҡыуанды. Ауыл китапханаһына әүҙем йөрөгән балалар үҙҙәре шиғыр һөйләп күрһәтте, йомаҡ ҡойҙо. Тәнгә кәнфит рәхәтлек бирһә, йәнгә рухи аҙыҡ талап ителә. Шуға ла ата – әсәләр балаларын туған телдәге рухи аҙыҡтан – “Аҡбуҙат” журналынан мәхрүм итмәһен ине. Яҙылһындар, бала менән бергәләп журналды уҡыһындар, ундағы башватҡыстарҙы, ребустарҙы бергәләп сисһендәр, әкиәттәр уҡыһындар, батырҙарыбыҙ тураһында мәғлүмәт алһындар, баланың белмәгәнен өйрәтһендәр ине.